MARATON

Andung andung, gaek gaek bakaja bajalan ka arah surau batungkek jo ba lampu togok. Pai ka surau mangaja wukatu sumbayang subuah. Meski alah ado lampu listrik, tapi jalan jalan ka surau indak ado lampu penerangan di tiang tiang listrik. Kok ado ciek ciek bolanyo lah putuih indak ado nan ka mangganti. Tungkeknyo pacik di tangan suok, lampu togok di tangan kida, takah anduang Sapi, anduang Jalisah, anduang Insyah bakodek jo batikuluak tilakuang.

Suaro azan basahutan dari satiok tiok Surau pakai pangareh suaro. Bunyi gudencak anak anak kampuang jolong gadang nan lalok di surau alah jago maramian pulo suaro azan. Hari masih kalam. Cahayo jutaan bintang babintiak babintiak batebaran di langik indak cukuik untuak manarangi kalamnyo wukatu subuah.
Di tampek tampek wuluak surau, bakuncalacak lacak bunyi aie urang urang ma ambiak wuluak. Heboh bunyinyo di tambah nan gadang suaro mamakak.

Nan lalok di rumah Gadang indak ketinggalan pulo buncah cando samuik ka lua sarang pai ka surau. Bakaja kaja pacu capek. Nio capek sumbayang subuah, nio capek, sacapek nyo imam manyalasaian sumbayang subuah ba jama'ah.

Nan indak saba, sumbayang surang sajo di langkan musajik nan kalam. Balari pulang dulu atau lansuang pakai sipatu balari ka labuah. Ciek duo ado nan indak peduli urang rami ka surau ka sumbayang subuah, tapi nyo lah lari duluan ka labuah.

Di baliak bukik barisan alun tampak cahayo matohari ka macogok. Nan sumbayang subuah bajamaah tingga anduang anduang jo gaek gaek nan khusuak bazikie sampai iman salasai ba do'a.
Anak anak nan rami tadi ma ikui sumbayang, alah malipek kain saruang nyo surang surang, saruantunyo ondokan di suduik suduik surau, lansuang balarian pulo ka labuah. Alah indak saba sajak jago lalok tadi.

Hari alun tarang bana, masih agak kalam juo. Suaro azan subuah tadi alah di gantikan jo suaro ayam jantan bakukuak. Ambun ambun masih lakek mambasahi bamacam macam daun daunan. Di labuah lah rami anak anak mudo jolong gadang, laki laki padusi, barombong rombongan ka arah mudiak labuah. Karano hari libur sikola, hari Minggu.

Pado hal banyak nan bajalan kaki, balari sabanta sabanta, sudah tu bajalan pulo, sudah tu balarian pulo baliak sabara talok. Itulah namonyo maraton. Subanayo bukan maraton, mungkin istilah sajo. Karano indak ado kato kato nan cocok ka di sabuik an untuak kegiatan satiok minggu pagi tu. Mungkin cocoknyo lari pagi, tapi itu terlalu ba Indonesiakan bana Minangnyo. Antah sia pertamo kali nan manyabuiknyo mangko maraton, indak ado sejarahnyo nan mancataik.

Dari sekian banyak nan bajalan kaki, balari, bajalan, banyak juo nan sabana balari indak baranti ranti sampai ka Aie mancue. Si Satish jo kawan kawannyo misalnyo. Si Satish memang anaknyo suko balari. Kalau lah tujuah baleh Agustusan di kantue camaik, Satish acok sato batandiang maraton 10K. Inyo acok mambao namo sikola nyo lomba 10K di kecematan kecematan lain, bahkan Satish pernah sato lomba WisataTon tingkek umue nyo, karano urutan pemenangnyo sampai no 5 sajo, Satish indak masuak pemenang doh, karano Satish dapek urutan no 7.

Tujuan maraton tu kalau ditanyo ka dalam diri anak anak mudo tu adolah wukatu dan tampek untuak malapeh maso peralihan fase kehidupan dari ketek ka mudo, mudo ka dewasa, sambie balari pagi. Maso puber istilah urang phisikolog.

Capek capek nio balari ka labuah, balari sasudah sumbayang subuah, nio pai katampek nan maisi wukatu maso peralihan hidup sebagai manusia.

Sapanjang jalan labuah dari kampuang bagian ilie sampai kampuang paliang mudiak, nan jumlah rombongannyo banyak ado nan bapenca manjadi rombongan ketek ketek tigo sampai 5 urang. Icak icak latiah. Pado hal di mukonyo ado sakolompok nan padusi salah satunyo pujaan hati.

Oto lalu dari balakang manarangi jalan, basamo samo manapi saketek dakek ka tapi. Oto ketek nan lalu, larinyo kancang. Lalu pulo oto parah jo lampunyo nan tarang pulo, sanang hati. Oto parah lambek jalannyo, tarang lampunyo labiah lamo, labiah lamo pulo bisa mancaliak pujaan hati dari balakang. Itu lah bagi nan panakuik.
Nan bagak, basingajo mairiangi rombongan padusi dari sampiang. Balari basamo samo, baranti basamo samo. Tapi indak barani bairing baduo duo, barani dek basamo samo. alah bagak namonyo. Takuik, malu, dicaliak urang kalau maraton balari baduo duo. Kalau barombongan indak ketahuan bana. Cuma hati nan tau.

Wukatu subuah lah pai, kilau cahayo matohari saketek sangaik alah mancogok di puhun sekedar tarang sajo baru. Balari ma ayun langkah mandaki di jalan labuah. Badan saketek basah jo paluah. Jalan mandaki babelok di Bukik Tambun tulang. Malewati jalan labuah tapi bukik cagar alam subalah kida, jurang ba Batang anai di bawahnyo subalah suok. Udaro pagi taraso tawa dialam kaki gunuang Singgalang. Oto bus jo oto parah ciek ciek nan lalu. Indak saketek pulo rombongan anak laki laki nan subana balari maraton sampai ka Aie mancue.

Satish sampai balari di Aie mancue. Basuah muko, kumue kumue jo aie nan taraso es jatuah dari ateh bukik. Aie tajun jatuah ka lubuak nan babatu ma ambuihan angin mambao tampieh ka badan, manambah tawanyo pagi.

Satish jo kawan kawannyo babaliak ka bawah balari lari ketek. Ado nan sampai di Aie mancue ado nan indak. Sampai pakelokan bukik Tambun tulang, baliak liak ka ilie, nan sampai di simpang Malibou sajo ado juo.

Bajalan barami rami, bakelompok kelompok ka bawah baliak. Iko lah wukatunyo nan raso sanang di hati, nan mambahagiakan. Hari lah tarang, jaleh nan di caliak. Mancaliak dari balakang pujaan hati. Beda jo ka pai tadi, hari masih kalam, tarang kalau ado oto lalu.

Lah tibo di rombongan nan banyak rombongan Satis jo kawan kawan nyo, baranti balari. Bajalan pulo basamo samo. Satish urangnyo panakuik jo indak percaya diri ka kawan padusi. Pado hal inyo anak tamasuak pandai disikola. Jadi ketua kelas. Barani tampil di sikola untuak baprestasi, tapi indak barani dakek jo padusi. Kok padusi kawan biaso sajo lai indak takuik doh tapi padusi nan suko dihati manjadi lain bawaan nyo.
Di muko nyo sarombongan padusi bajalan ka ilie, ado si Putri di antaronyo. Satish mairiangi dari balakang. Jan kan ka ma ota sambie bajalan bairiang iriang, manyapo sajo lah manggaretek lutuangnyo.

"Dari pado manggaretek, beko indak bisa bajalan pulang, bialah iriangi sajo dari balakang, takah ko kan lah sanang juo hati" Baitu hati Satish bakato.

Sambie ma ota jo kawan samo gadang, hati di dalam sanang, ma ayun langkah ma ilie i labuah. Dari ateh si Idrus jo si Hendri balari, tibo dimuko rombongan Satish jo kawan kawan, inyo baranti. Bajalan, bagabuang bairiang jo rombongan si Putri.
Sia nan indak kasuko samo si Putri, urangnyo rancak, tinggi, rambuik panjang hiduang mancuang, kulik putiah. Pakai baju kaos langan panjang putiah, sarawa training panjang biru, sipatu olahraga putiah, rambuik panjangnyo bakabek takah ikue kudo bakaluakan di balakang panjapik topi di kapalonyo.

Hati Satish lansuang barubah, jantuang badabuak kancang mamompa darah ka kapalo. Paneh hati ko, angek sarupo aie di abuih sampai manggalagak. Matohari nan tampak tarang bacahayo seolah olah jadi kalam. Antah kalam hari ka hujan atau kalam karano masih malam. Antahlah. Saraso patuih manggalagak di langik nan tarang.
Ruponyo bungo nan dicaliak rancak, ado kumbang lain nan ka inggok, indak ciek kumbang di taman.

Badan lah latiah balari dari tadi subuah, batambah lenyoi mancaliak si Idrus jo si Hendri bajalan basamo si Putri. Padahal baru mancaliak caliak, alun pernah mangecekan kato hati ka si Putri. Apo dayo, indak bisa apo nan kadi pabuek.

Garah kawan mambao galak, di paso dari dalam hati. Ma ayun langkah pulang ka rumah. Di tapi labuah di pakeloan sabalun jambatan pasa Tembok di subalah suok, tampak palak tabu nan batangnyo alah patah patah jo nan tacabuik i. Sapanjang labuah bakalabuik an pulo sarok putiah putiah nan ruponyo sarabuik tabu ju kulik rambutan. Ado sakolompok anak laki laki basingajo wukatu hari masih kalam tadi baranti sabanta, balari singgah ka palak tabu urang tu jo batang rambutan urang.

Satish badannyo panek indak cuma karano balari, tapi mancaliak nan di caliak di iriangi kawan. Hari batambah tarang juo, nan masih jauah rumah nyo di ilie baliak naiak oto pulang. Oto ciek ciek nan lalu dari subuah, kini alah mulai banyak mangalasau. Bus bus antar propinsi alah masuak bajalan ka ilie. Satish bajalan maayun langkah nan taraso gontai takah mambao barang barek labiah barek dari oto dasun bainsuik insuik mandaki ka darek mambao barang ka galeh amak amak. atau oto parah nan maogok ogok mandaki Silaiang.

Ambun nan mambasahi rumpuik jo daun padi di tapi labuah alah kariang. Matohari bacahayo tarang bahagia manapakan badanyo, tapi Satish manyimpan hati nan sadiah marenungi kekurangannyo. Anak anak nan lalok di surau singgah dulu ma ambiah salimuik saruang nan ba ondokan disuduik suduik dalam surau. Tarang mato hari siap ka mangariangi baju sikola nan dibasuah hari minggu ko untuak ka di pakai bisuak pagi. Kalau Minggu pagi pakan ciek lai, kok lai rancak juo hari, Maraton pulo baliak.

Carito kenangan Oleh Dedy H